طريقة حل المشاكل التي تقابل دهان عربيتك و ازاي تحلها
2 مشترك
كاتب الموضوع
رسالة
سمسم عضو الماسى
عدد الرسائل : 2412 نقاط : 4225 تاريخ التسجيل : 05/11/2008
موضوع: طريقة حل المشاكل التي تقابل دهان عربيتك و ازاي تحلها الثلاثاء يناير 12, 2010 4:57 pm
طريقة حل المشاكل التي تقابل دهان عربيتك و ازاي تحلها
اهلا بكم احبابي في المنتدى بصفة عامة .........((وفي القسم بصفة خاصة)) فى تاني موضوع لي هنا معكم فى القسم اللي بتمنى يارب انه يلاقى استحسان منكم و يفيدكم ان شاء الله .........
مفيش شك في ان كتير مننا بتقابله مشاكل مع دهان عربيته ......مثلا ممكن تكتشف بعد الرش بيوم او اتنين وجود بقايا دهان
على الزجاج او الاطارات الكاوتش او الفوانيس.... او ممكن تتخبط العربية لا قدر الله....
او ممكن تتعرض لخدوش (( تتخربش )) ..وغيرها من المشاكل الوارد انها تقابلنا زي البارومة مثلا او الشقوق ....طبعا كل المشاكل دي وغيرها لها اثر سلبي على مظهر العربية .... .
الموضوع بقى الغرض منه هو انك تعرف ازاي تحل المشاكل دي كلها باقل تكلفة ممكنة و ايضا انك تعرف ازاي تحمي عربيتك من المشاكل دي... من باب (( الوقاية خير من العلاج .......))
(( المشكلة الاولى )) : و دي اكتر مشكلة بتقابل الناس و هي ان العربية تتخبط (( لا قدر الله )) و دي حلها بيعتمد على درجة الخبطة بمعنى الخبطة خفيفة او جامدة
1)) لو الخبطة خفيفة ((يعنى مالهاش اثر على الدهان )) و لكن الصاج داخل لجوه في الحاله دي بتكون العملية سهلة وهي انك بتروح عند سمكري انت بتثق فيه و تخليه يرجع الصاج لوضعه الطبيعي من غير مايقرب للدهان ...... العملية دي اسمها (( دق على البارد )) يعنى بيدق الصاج من غير استعمال الاسطوانة (( لهب الاكسيستيلين )) ودي بتساعد على رد الصاج لوضعه الاصلى قبل الخبطة و في نفس الوقت تحافظ على الدهان كما هو .....
و العملية دي تكلفتها حسب مساحة الخبطة يعني لو الخبطة واخدة الباب مثلا بتتكلف اكتر من انها تكون واخدة جزء من الرفرف
بس هي بتتكلف من اول 40 جنيه الى 100 جنيه (( شامل كل الاحتمالات .....)) .
2)) الاحتمال الاسوء و هو لما تكون خبطة شديدة (( واكلة باب مثلا او كبوت ........لا قدر الله )) ساعتها انت بتاخد
العربية عند السمكري و هو بيرجع الصاج لوضعه الطبيعى (( و ممكن العملية تلزم قطع غيار يعني باب جديد او كبوت جديد )) المهم بعد ما السمكري ينتهي من شغله بتاخد العربية عند فني الدهان
فني الدهان في الحالة دي بيصنفر مكان اللحامات ان وجدت بواسطة الصاروخ و بيزيل
(( البرايمر )) و ده دهان لونه احمر فاتح بيستخدمه السمكري عشان يوضح لفني الدهان المناطق اللي اشتغل فيها ((
سمكرها )) ...و بعد كده بيزيل الدهان القديم بواسطة المزيل (( paint remover ))......... او ممكن بواسطة النار (( يحرق الدهان القديم ))......... او ممكن بواسطة سكينة المعجون (( يقشره )) و بعد مايقشره يصنفره بورق صنفرة رقم 60 و ينعمه بصنفرة رقم 120 .
و بعد ازالة الدهان.... بيمعجن بواسطة معجون ستوك (( stock )) و دي ماده غليظه لونها وردي ....طب ياترى بيمعجن ليه؟؟؟؟؟ عشان يخلى الصاج الجديد فى مستوى واحد مع الصاج القديم (( يعني يخلي الصاج الجديد اللي ركبه السمكري على مستوى واحد مع صاج العربية الاصلي ))
بعد مايجف المعجون بيصنفر بورق صنفرة رقم 60 و يتنعم (( يتسحق )) بورق صنفرة رقم 120 وبعد كده ممكن يرش
على المعجون مباشرة او يرش فلر الاول و ده مادة لونها ابيض او رمادي تستخدم فى سد اي ثقوب موجوده فى المعجون بعد
الصنفرة و بعد ما يرش الفلر ينعمه بصنفرة 320 و بعد كده يرش
و العملية دي مكلفة وممكن تتكلف من 200 الى 600 جنيه (( شامل كل الاحتمالات ))
طب لو فى حالة انك صحيت الصبح لقيت واحد خربش العربية بمسمار مثلا ساعته اول حاجة تعملها (( انك تدعي عليه ))
ساعتها بجد تروح عند فنى الدهان هايروح يطفى اللون حول الخدش بصنفرة رقم 320 و بعد كده هايمعجن مكان الخدش
طبقة معجون خفيفة (( قشرة )) .
و بعد ما المعجون يجف يصنفره بصنفرة رقم 120 بواسطة كاوتشة الصنفرة و الماء (( كاوتشة الصنفرة بتساعد انها تخلى
المعجون على مستوى واحد مع الصاج عند عملية الصنفرة )) و بعد كده بينعم المعجون بواسطة صنفرة رقم 320 و يرش
و دي تتكلف 40 جنيه بالكتير
و دي وارد حدوثها و هي بعد الرش بيوم او اتنين اكتشفت وجود بقايا دهان على المرايا او الزجاج او الجنوط او الفوانيس فى الحالة دي ممكن تعمل حاجتين ::::::
ا )) تروح عند فني الدهان اللي رشها و هو هاينظف الدهان الزيادة بواسطة قطعة قطن موضوع عليها تنر thinner
و طبعا ببلاش
ب)) انك تستعمل قطعة قطن عليها شوية جاز و تمسح الدهان الزياده .... .
(( المشكلة التالتة )) : و هى انك تكتشف وجود بارومة فى الصاج .............الاول عايز اوضح يعنى ايه بارومه و ايه سبب حدوثها .......... البارومة هي تاكل فى الصاج (( او المعدن بصفة عامة )) تنتيجة وجود الصدا
و سبب حدوثها هى الغسيل المتكرر للعربية (( عمال على بطال ))
ازاي تقدر تتخلص منها .............بطريقتين :-1))
تروح عند فني الدهان و هو هايمعجن البارومة و بعد كده يصنفرها اي كلام (( عشان يخلى المعجون ماسك و قوي )) و بعد كده يرش
و لكن بيني و بينكم الحل ده ينفع معاك لمدة 3 اسابيع بالكتير لان المعجون هايقع و تلاقى كل حاجة رجعت زي ماكانت
و ده ينفعك لو عايز تفحص العربية فى المرور و ماعندكش وقت
2)) و ده الحل الصح انك تروح عند السمكرى وهو هايلحم حتة صاج جديدة مكان البارومة و بعد كده تاخدها عند فنى
الدهان و هو هايصنفر اللحام بالصاروخ و بعد كده هايمعجن ويصنفر المعجون و ينعمه ويرش
و بالحل ده تقدر تنسى ان كان عندك بارومة اساسا ......
(( المشكلة الرابعة )) : و هى انك بعد الرش بفترة بسيطة لقيت الدهان اتشقق في الحالة دي بدون نقاش هاتروح لفنى
الدهان اللى رشها و تخليه يعملها و طبعا ببلاش
و لكن من اجل الافاده هاشرح ازاى فنى الدهان يحل المشكلة دي ..... الاول بيصنفر الشقوق بصنفرة رقم 60 عشان يشيل
الدهان التالف (( المتشقق )) و بعد كده بيمعجن الشقوق و يصنفر المعجون بصنفرة 120 و ينعمه بصنفرة 320 و يرش
اللون المناسب
ملحوظه ::: الدهان وارد جدا انه يتشقق او حسب لغة الحرفيين (( يطقطق )) بسبب المعجون انه ممكن يكون مش
متصنفر كويس او يكون ممعجن على صاج به صدا
(( المشكلة الخامسة )) : و دي بتحصل كتير جدا انك تلاقى على العربية قذورات او بويه (( بويه غريبة غير اللى استخدمتها فى الرش يعنى ناس بتدهن حاجة و قاتلوا ناخد عربيتك بالمرة ))
فى الحالة دي انت مش محتاج غير قطعة قطن و شوية تنر او جاز و تضع التنر او الجاز على القطنة و تمسح البويه او
القذورات دي
و في حل تانى انك تشتري من عند اى محل بويات علبة كمبوند (( campound )) و ده مادة بيضاء اللون خشنة
الملمس بتحط قطعة منها على المكان اللى عايز تنظفة و بعد كده تدعك بالقطنة كويس و دي بتتكلف من 3 الى 7 جنيه حسب
الماركة بتاعتها (( محلى او مستورد ))
و لكن ليه تكلف نفسك و تضيع وقتك وانت ممكن تتجنب كل المشاكل دي و غير كده ممكن تتعامل مع حرفي من اللي بيعملوا
من الحبه قبه عشان ياخدوا الطاق عشرة و ممكن مائة كمان ................
دول بقى شوية نصائح عشان تقدر تحافظ على دهان عربيتك سليم و نظيف لاطول فترة ممكنة :_
1)) اول حاجة انك ترش عربيتك فى التوكيل بتاعها عشان تضمن دهان صح يعني لا يتشقق او يطلع فيه اي عيوب بعد كده و لو ماعرفتش توديها التوكيل يبقى عند اي حرفي متمرس و بيفهم عشان يرشها صح
2)) انك تركن عربيتك فى جراج امن (( تبقى مطمن على العربية فيه )) عشان تتجنب شخص (( محترم !!! )) ممكن انه يخربش العربية مثلا او قول يسرق منها حاجة
طب لو هاتركنها لفترة قصيرة (( مسافة ماتشترى حاجة مثلا )) يبقى تركنها فى حتة صح .....ازاي؟؟؟!!!!
يعني تخلى في مسافة مناسبة بينك و بين العربية اللى وراك و العربية اللى امامك و تركنها بعيد عن القلق يعني بعيد عن
ناس بتدهن محل او واحد بيلحم حاجة او خناقة او فرح او ناس بتكنس الشارع .............الى اخره
3)) تستعمل شمع العربيات (( car wax )) و ده ماده شمعيه بتستعمل فى حماية دهان العربية لانه بيعمل طبقة تحمى
العربية من الاحتكاكات او السحجات ..........................ازاي نستعمله !!!!؟؟؟؟
الاول انت مش محتاج غير قماشتين نظاف و علبة الشمع (( مع فرض ان القماشتين اسمهم ا و ب ))
بتحط حتة شمع باصبعك على الدهان و تدعكها بالقماشة (أ) بس بالراحة لمده دقيقة (( و تخلى اثر للشمع على الدهان ))
بعد كده تترك الشمع لمدة ثلاث دقائق على الدهان و بعد كده تدعكه بالقماشة (ب)
تستمر العملية مع العربية كلها و يفضل ان العربية تكون مغسولة قبل وضع الشمع و علبة الشمع ممكن توصل ل 40 جنيه كحد اقصى
4)) غسيل العربية يبقى كل 10 ايام و دي مدة مناسبة جدا عشان تحافظ على العربية نظيفة من غير ما تتسبب فى البارومة او الصدا و يفضل لو كان فى محطة البنزين
بس لو العربية لسه مرشوشه من قيمة يوم مثلا ...............في الحاله دي يفضل الغسيل اليدوي عشان غسيل محطة
البنزين بيبقى عنيف ممكن ياثر على الدهان
5 )) تلمع العربية بواسطة بولش (( polish )) و ده فعل انجليزي بمعنى يلمع و العلبة بتتكلف 12 جنيه (( مستورد -امريكي ))
و ده مادة لونها ابيض يميل للاصفر و ناعمه و شبه سائله و عشان تستعملها و تلمع بها العربية انت محتاج قطعتين قطن
(( ا و ب مثلا )) بتحط بعض البولش على الدهان و تدعكه كويس بالقطنة (أ) وبعد كده تكمل دعك بالقطنة (ب)
و لما تحط شويه تاني برده تدعكهم بالقطنة (ا) و تكمل دعك بالقطنة (ب) و هكذا
و ممكن تستعمل الكمبوند مع البولش لو في قذورات او بويه على العربية
منقول بسم الله الرحمن الرحيم انما المؤمنون اخوة..
ام احمد المصريه عضو الماسى
عدد الرسائل : 3574 نقاط : 4261 تاريخ التسجيل : 05/09/2007
موضوع: رد: طريقة حل المشاكل التي تقابل دهان عربيتك و ازاي تحلها السبت نوفمبر 09, 2013 1:45 pm
موضوع مميز شكرا لك
طريقة حل المشاكل التي تقابل دهان عربيتك و ازاي تحلها
الرئيسية 
ألعاب 
