قصيدة بحب الحياه

بحب الحياة .. بحب الوجود ..


بحب التحدي .. بحب الصمود ..


بحب العناد وطلب المحال


و أعيش حرة حتى فـ أسر القيود


مادام قادره ديما على الاختيار


وبحلم .. و برسم .. وبصنع قرار


إيه يعني لما تصيبني الخناجر


ما دام قلبي لسه ماليه الورود





بحب الطريق اللى كله حفر


بحب امتحانات و آلام القدر


بحب المقاومة و دمع التجارب


اللى بتصنع تراث البشر





بحب اللى يقدر يثور ع الفساد


بحب اللى يرفض يعيش كالجماد


بحب التحدي .. بحب العناد


ومخضعش إلا لرب العباد





بحب التفاؤل أمام الصعاب


وعارفه إن أصلي شوية تراب


أعيش كل عمري بعزة و كرامه


ومتركش حقي عشان السلامه


و إدراكي إني أكيد يوم هموت


يخلي آلامي و دمعي يفوت


و أرجع أقاوم و أحلم .. و أحب


و أرسم جناين و أرسم بيوت





بحب الضمير .. بحب الشرف


بحب التمسك بحلم و هدف


بحب الوفاء .. بحب العداله


بحب التميز حتى الثماله


بحب الشعوب الـي رافعه الجباه


بحب الإرادة .. بحب الحياه


بحب الحياه